Tänhään oon 40 v sitte ko iso kryyvstrejkki alkoi Norrbottenissa. Ensin se alko Svappavaarassa ja sitte Kirunassa ja Malmivaarassa. 5 000 ihmistä strejkkasit yli 50 päivää mm huonon tilin ja huonon miljöön takia. Tili riitti juuri ja juuri ruokkhaan mutta ei mihinkhään muuhun. Työntekijät sai olla myötä kaikissa testissä, esim kuinka kauon se ottaa kruuvata kruuvia tai lyöä vasaralla naulan. Ei ens saanu istua hyysikässä rauhassa. Työntekijät ei ollheet minkhään väärtit ja ihmisarvo katosi. Fakki ei mitenkhään auttanu tässä hommassa, päin vastoin. Strejkki ei ollu tärkeä vain täällä Norrbottenissa vain koko Ruotissa ja työntekijöitten elämä muutu strejkin jälkkheen paremphaan monille. Strejkin aikana oli rankkaa ko ei saanu misthään mitthään rahhaa. Monet ihmiset koko maasta anto lanttia että työntekijät klaarasivat tämän ajan. Sitä arvaa että moni joka strejkkasi varmasti pelkäsi – Ådalen pyöri mielessä.
Minusta se oon niin kumma että tämä tapahtu täällä Norrbottenissa 40 v sitte – ei se oikeasti ole niin kauon aikaa. Miten mutäärni Ruotti saatto kohella ihmisiä niin huonosti? Mutta joskus kyllä tuntuu että vielä tänhään ihmisiä nöyryytetthään Ruotissa, esim saihraita. Onko uusi strejkki lähestymässä?
Inga kommentarer:
Skicka en kommentar