Te oletta varmasti nähny ainaki mainoksia tai pätkiä Svenska Hollywoodfruarista joka näyttethään Ruottin TV3:assa. Se oon jo toista sesonkia menossa. Sarja seuraa neljä ruottalaista vaimoa jokka oon/oon olheet naimisissa jonku rikkhaan miehen kans. Ko mie ensimäistä kertaa näin pätkän niin mie uskoin että nämä vaimot olit näytteliät ja että sarja ei följany ”oikeata” elämää mutta kaikki näyttää olevan tosi! Tietenki ne voiva vähä pelata mutta kuitenki.
Nämä ihmiset assuu isoissa taloissa (tai linnoissa – yhelä oon 900 m2 kämppä!), ostelevat mitä haluavat, järjestelevät kaiken maailman fästia ja monet oon hullun kranttuja. Jollaki näillä (kaikila?) oon kontakti ”tavallisheen” elähmään aivan kaonu.
Mie hunteerasin että jos teevee tekis sarjan vaimoihmisistä jokka assuu Tornionlaaksossa. Mitenkhään se elämä eroaa Hollywoodista? Mie kuitenki uskon että siitä tulis popylääri ohjelma. Piiain me saisima nähä saunomista, skooterin ajoa ja toivottavasti kuulla meänkieltä. Ainaki yksi asia oon varma: me saisima järkevän programmin!
Inga kommentarer:
Skicka en kommentar