Mie luin eilisessä avisissa että Raj Raj Band Pajalasta nyt oon tekemässa viiettä skivaa. Panti oon jo pelanu yhessä kohta 11 vuotta ja ovat vieläki kauhean popyläärit. Niilä oon Facebookissaki 700 hengen fanklupi. Miksi ihmiset tykkäävät tästä muusikistä niin hullun paljon? Eihän ne tekstit nyt niin kauhean hyviä ole eikä itte sävelmätkhään. Useasti tekstit oon aika pinnaliset ja monta kertaa vitsit liityvät sukupuolihomhiin ja viihnan. Semmoset laulut voipi olla hauskoja kuulla jonku kerran mutta ei 11 vuoen ajan! Ei tietenkhään Raj Raj band vain tehe hejs-svejs lauluja mutta kuitenki sanosin että eniten. Onhan niillä syvempiäki lauluja ko esimerkiksi ”On kaipuu tänne aina pohjaton” (teksti: Paul Muotka). Mikä se sitte tekkee että ihmiset aina tulevat kuuntelehmaan pantia?
Mie uskon että siinä oon monta ”syytä”:
• laulavat meänkielelä
• huumori
• meikäläisiä
• täynä energiaa – antavat aina 100%
Justhiinsa se että ne laulavat meänkielelä oon, minusta ainaki, se suuren syy pantin popyläärisuutheen. Aivan niinku Jord ja Tornedalsteater. Ja kyllä mie häyn sanoa että se haitarin pellaja, Fredrik Isaksson, oon niin hyvä. Se kyllä käyttää koko kroppaa ko pellaa ja oiken näkkyy ko se ellää yhessä haitarin kans. Piiain se huumoriki oon niin tärkeä koska monelta meistä vielä tuntuu hankalalta käyttää meänkieltä. Raj Raj Band sekottaa kielen ja huumorin ja kynnys tuntuu sillä konstin piiain pienemältä?
Mie toivon kaikkia hyvvää Raj Ran Bandile ja toivon kans että met jokka puhuma meänkieltä saama enempi kulttyyrikokemuksia omala kielelä. Huumoria, rakkhautta, pelkoa, vakavuuta, surua ja unelmia. Lissää Raj Raj Bandista: rajrajband.com
Inga kommentarer:
Skicka en kommentar