Mie olin Matarengissa pyhän aikana ja sunnuntaina menin ulos kävelehmään. Mulla oli reflexivästi päällä ko ulkona oli säkkipimeää. Se ei ollenkhaan ollu soma kokemus marsia ko ei yhtään katulamppua loistanu. Mie en ole meinanu kirjottaa tästä Styrmannin liikheestä mutta nyt mulla kiehu yli! Mulla on kuitenki aika hyvät jalat ja näen hyvin (no, mulla oon silmäklasit mutta niitten kans näen hyvin) ja kuitenki olin niin lähellä langeta ko en nähny että asfaltissa oli kuoppia. Oli siinä ja hänessä että mie en joutunu kravhiin. Miten sitte ihmisillä jolla oon vaikeuksia liikua?
Tämä hulluus vaikutta niin paljon ihmisitten elähmään ja varsinki fyysisheen ja psyykisheen terhveutheen. Monet tuntee ittensä isoleeratuksi ko ei ulos tohi mennä kävelehmään tai ajaa piiliä/pyörää. Ei pääse kylhään tai kaupphaan. Ei voi olla matkassa eri vapaajan aktiviteetissä jos ei asu aivan lähelä. Mie hunteeran kuinka paljon kaikki nämä asiat maksavat yhteiskunnale. Se oon tyyristä ko me ihmiset tarttema hoitoa vårdcentralissa tai sairaalassa. Mitä esimerkiksi murtunu jalka maksaa? Jos krockaa piilin kans? Miten se vaikuttaa ko ei voi olla ulkona ja tuntea ittensä turvaliseksi?
Mie häyn kans tunnusttaa että en ossaa ja tiiä kaikkia eri vaiheita tästä sähkösirkuksesta mutta mie tiiän kuitenki sen että tämä asia ei ikinä olisi menny näin pitkäle etelässä ja/tai Stockholmissa, Göteborgissa, Malmössä. Jos kunta ei olisi pystyny ratkasemhaan asiaa niin valtio olis ottanu vasthuun. Ihmiset ei olis hyväksynheet tämmöstä pimmeyttä ja politiikot olisi häätynheet tehhä jotaki eikä vain oottaa ja oottaa!
Mie tykkään että matarengilaiset ja haaparantalaiset vaativat että politiikot ottavat vastuun NYT. Jos kunnan politiikot eivät itte voi ratkasta asiaa (siltähän se näyttää) niin vaatikaa apua Norrbottenin riksdagspolitiikoilta/kansaneustajilta. Ja jos se ei auta niin menkää vielä korkeamalle. Tämä hulluus hääty loppua varsin!
Kuvan olen ottanu kotisivulta expressen.se
Inga kommentarer:
Skicka en kommentar